• Traémosvos hoxe unha novidade moi especial: "China. Una historia", escrito por John Keay e editado por ECC.

    A pesar da influencia que ten China no mundo actual, moitos de nós ignoramos a incrible historia deste país tan vasto como complexo. E con todo é ese pasado cheo de perdas, de logros sobrehumanos e de invencións inauditas o que define e explica a superpotencia que é China hoxe en día.

    Dende Confucio ata Mao, e dende o alba das lendas a través dunha sucesión de dinastías ata o clamor da revolución e do capitalismo escorregadizo actual, John Keay ofrece un relato cautivador da nación máis grande e menos comprendida do mundo. Esta narración, que usa os resultados das investigacións máis recentes, cobra vida a través de varias anécdotas e vese enriquecida por medio de comparacións provocadoras, cubre 3000 anos de logros extraordinarios e percorre todas as rexións de China, dende os grandes centros urbanos ata os lugares máis remotos.

    Este relato, tan digno de crédito como cheo de preguntas, é tan indispensable como definitivo par aentender este país que sen dúbida terá un rol principal no noso futuro.

    Un título imprescindible para coñecer un país tan recoñecible como descoñecido!
  • Traémosvos hoxe a última novidade da pequena editorial Axóuxere: "Novas do exterior. 63.000 quilómetros de viaxes á cadea", de Xosé Luis Santos Cabanas.

    Neste libro hai unha fronteira que divide o mundo, a que forman os muros e os arames da prisión, e tamén quilómetros e quilómetros de estradas, percorridos co desexo de achegarse a un ser querido, de reducir a distancia que o separa do fogar.

    Crónicas dunha viaxe, a do autor e a súa compañeira, para ver o fillo, arrastrado polo espectáculo político construído arredor do que deron en chamar Resistencia Galega, e detido nunha operación policial na que foron usados procedementos tristemente próximos aos de tempos en apariencia xa superados.

    Un fillo condenado ao afastamento xeográfico, o illamento carcerario e a incerteza do próximo destino. Este libro lémbranos -perante a impunidade dun sistema que precariza a liberdade propia de cada cidadán- que a revolución do cotián é a mellor forma de resistencia, e que fronte á violencia do Estado temos armas que non disparan, senón que vencellan os seres humanos: un activismo de xestos solidarios que racha os muros das cadeas. Fronte á fala burocrática da administración carceraria e a súa visión unívoca, fronte aos berros e a linguaxe autoritaria, temos palabras que conversan e comparten. Fronte aos edificios grises e enreixados das prisións, que levantan muros entre a xente, posuímos a arquitectura colectiva dos afectos, a construción vagarosa, mais tamén firme, dun espazo común de liberdade.

    A que estades agardando? Non vos perdades este extraordinario e estremecedor libro que non deixa indiferente a ninguén!



  • Velaquí un título que xa mencionamos na entrada adicada ás editoriais Darkland e Medianoche: "El arrecife del escorpión", de Charles Williams, e cuxa información vos ampliamos agora.

    Ao aceptar o traballo inseguro e perigoso que lle ofreceu aquela loura impresionante de aspecto nórdico, Manning sabe que xoga a vida; e aos poucos días ten a seguridade de que os seus patróns, unha banda de gángsteres, están dispostos a matalo en canto deixe de serlles útil. E todo elo a cambio de converterse en propietario do balandro no que navegan polo Golfo de México e, talvez, do amor dunha muller.

    A grandeza desta novela semella non ter discusión. É unha novela sobria, cargada de vitalidade e profundamente orixinal. O seu trepidante ritmo narrativo, o seu sentido da aventura e da intriga, o insólito escenario mariño no que se desenvolve, a súa profunda historia de amor, o inesperado desenlace, todo contribúe a crear unha historia en que os personaxes, despoxados da súa personalidade literaria, alacanza a dar un estremecedor e fidedigno testemuño de violencia.

    Ten esa contundencia e esa pureza dos grandes mestres norteamericanos da novela negra.

    Non quededes sen el!



  • Traémosvos hoxe a más recente novidade da editorial Galaxia: "Un dente sen cadáver", que recolle un novo caso de detective Frank Soutelo escrito polo autor carballinés Miguel Anxo Fernández.

    Nunha imprevista viaxe a Galicia para recoller unha herdanza, o detective Frank Soutelo, coa axuda da investigadora Dalia Maxino, enfróntase indesperadamente a un enigma: a aparición dun dente humano sen dono e de orixe descoñecida. Ambos os asuntos - familiares e forenses- han acabar confluindo nun complexo caso no que a violencia de xénero, a explotación sexual, a man de obra inmigrante e os escuros intereses inmobiliarios se mesturan con personaxes sinistros, coas mans emporcadas de sangue. Novamente, coa axuda do sarxento da municipal Franeiras, o sempre indignado ex-garda civil Poncio e a forzada colaboración do estricado funerario Sugar Jones, Soutelo descubrirá tamén un doloroso pasado vinculado co seu pai.

    Miguel Anxo Fernández retorna ao detective máis singular do panorama literario galego.

    Non volo perdades!



  • Velaquí unha das máis recentes novidades que a editorial Xerais vén de publicar na súa colección "Memorias": "A prensa en Galicia na Transición", de Marcos Pérez Pena.

    Que papel xogou a prensa galega durante a Transición política? Foi por diante ou por detrás da sociedade? Que posición adoptou ante a reivindicación dunha autonomía de primeiro nivel para Galicia? A Transición configúrase como o momento fundacional do sistema democrático vixente, da actual organización política e da estrutura socioeconómica; tamén da estrutura de medios. Todos eles postos en cuestión recentemente nunha crise ligada ao esgotamento desa estrutura fundacional.

    Os xornais son a testemuña do seu tempo e, á vez, unha ferramenta fundamental para darlle forma. Ao longo da Transición, a prensa serviu de escenario para a loita entre varios proxectos de sociedade e, en maior ou menor grao, foi escaparate das ansias de cambio. A iso contribuíu a chegada ás redaccións dunha nova xeración de xornalistas que, grazas a unha liberdade da que hoxe carecerían na maior parte das empresas, sinalaron un camiño para a democratización do país e tamén para as demandas de autogoberno.

    En "A prensa en Galicia na Transición", Marcos Pérez Pena realiza un minucioso percorrido polos principais acontecementos sociopolíticos da época para recoñecer o papel determinante dos xornais no seu desenvolvmento. Moitas cousas mudaron despois, a partir de 1980, unha vez consolidado o proceso de Transición e fixados os límites do consenso. Tamén nos medios, onde os xornalistas viron moi limitada a súa autonomía.



  • Traémosvos hoxe unha das máis recentes publicacións da editorial Xerais: "O amor nos escuros días de Birkenau", de Alberto Canal.

    É o amor a mellor arma para loitar contra a barbarie da sinrazón humana?

    Pode alguén confiar na bondade dese sentimento nun lugar onde hai que pelexar cos seres máis queridos por respirar a última barbulla de osíxeno que fica nas cámaras de gas?

    Estas son algunhas das preguntas que asaltaron a Thomas Münch pouco tempois de coñecer a Irene Rosenthal na fábrica de munición dos campos de extermino de Auschwitz, a onde acudía regularmente a cortarlles o cabelo ás presas. O perruqueiro berlinés confiaba en que só ese sentimento podía levalo a esquecer a xenreira que sentía cara aos xudeos para implicarse nunha revolución que os afastase do inferno de Birkenau. Máis sempre pairaba sobre el a mesma dúbida: era realmente posible o amor en Birkenau?

    Unha fantástica novela que non podedes deixar de ler!

    Velaquí a páxina do autor na que se fala da novela.





  • Presentámosvos hoxe unha novidade na nosa libraría, ou dúas, segundo por onde se mire. Trátase das editoriais Darkland e Medianoche, que non son senón as dúas caras da mesma moeda, de aí que poidamos falar dunha soa novidade. Estes selos editoriais nacen en Torrelavega (Cantabria) e tratan de ofrecer ao lector diversas lecturas: algunhas novas e outras de hai anos e que se recuperan agora.

    Baixo o selo Darkland, temos os seguintes títulos: "El pirata negro", de Arnaldo Visconti, que recompila as novelas "La espada justiciera", "La bella corsaria", "Sucedió en Jamaica" e "Brazo de hierro", que o autor comezou a publicar no 1946; "El fantasma de Baker Street", do grande Curtis Garland, o (con permiso) máis importante autor de bolsilibros de España, que relata unha aventura moi holmesiana, e "Rancho Drácula", de Silver Kane, outro dos grandes escritores bolsilibrescos, un western con toques vampíricos.

    E a través de Medianoche publícanse: "El arrecife del escorpión", de Charles Williams, un clásico da novela negra de 1955 a reivindicar, e "Carter & West, de Ana Bolox, que reúne dúas aventuras dos personaxes protagonistas cuxos nomes dan título ao libro.

    Cinco títulos moi a ter en conta!





  • Velaquí unha das máis recentes novidades da editorial Galaxia: "Aqueles días en que eramos malas", de Inma López Silva.

    Unha monxa, unha puta, unha moza colombiana e unha funcionaria de prisións comparten o módulo de mulleres dun cárcere e viven xuntas encerro, rebelións, lembranzas e emocións.

    Así o relata Inma, a escritora que compartiu cela con elas e que non se resiste a vencer a súa incapacidade para escribir contando a vida de cando foron malas, unha historia que, pouco a pouco, se converte na confesión e testamento literario da autora.

    "Aqueles días en que eramos malas" é unha novela áxil e emocionante que transita entre a traxedia e a comedia. O cárcere como un mundo descoñecido, situado nas marxes da sociedade e da vida, no que existen vítimas, verdugos e, sobre todo, historias vitais fascinantes.

    A novela máis ambiciosa de Inma López Silva.

    Non quededes sen ela!



  • Velaquí unha novidade moi especial. Trátase de "Corpo-circuítos. Máquinas de subxectivación", de Abraham Rubín, o último libro publicado pola editorial especializada en filosofía Euseino?

    A Idade Moderna caracterízase polo dominio que nela exerce o suxeito como posibilidade exclusiva de acceso ao mundo. Só existe aquelo no que el pode pensar. O suxeito acada -definitivamente?- o estatuto de principio e límite transcendental.

    O autor deste libro analiza, interpreta e desentraña o mecanismo aparentemente inevitable no que se orixina ese efecto de dominación. Corpos que, como máquinas de subxectivación, imprimen a súa pegada encol da superficie de inscrición chamada capitalismo. A subxectividade como produción.

    Materia prima, moeda de cambio e de crédito, a subxectivación tamén é alicerce dun réxime de traballo inmaterial e emocional, dunha economía que se constitúe como legalidade única das disposicións e equipamentos colectivos e acaba por dar forma ao desexo como consumo, ao futuro como débeda.

    Fronte a ese suxeito endebedado xorde a subxectivación do común: a diferenza, o desaxuste, a posibilidade imposible do compartido. Corpo-circuítos que non buscan destruir o dado senón resignificalo ou impulsalo cara a outra dirección. Subxectividades, en ningún caso suxeitos, que se poderían facer cargo dunha comunidade en vías de constitución.

    O libro máis axeitado para os amantes da Filosofía!



  • Velaquí unha novidade de Colmena Ediciones: "Carter & Lovecraft", de Jonathan. L. Ward, un libro cuxos dereitos adquiriu Warner Bros. para a súa adaptación a serie de TV.

    Daniel Carter traballaba como detective de homicidios, pero o seu último caso (a caza dun asasino en serie) tivo un final tan estraño e desolador que decidiu abandonar o corpo de policía e establecerse pola súa conta como investigador privado. Sen embargo, o seu desexo dunha vida tranquila, alonxada do extraordinario e o inexplicable, semella con querer cumprirse.

    En primeiro lugar, herdará unha libraría en Providence de alguén do que xamais oira falar, e alí coñece a unha libreira exasperada que non quere soportar a un novo xefe. Ela é Emily Lovecraft, a última descendente coñecida de H.P. Lovecraft, o escritor que contou as historias dos Antigos e os Deuses Primixenios, criaturas e entidades máis alá da comprensión humana.

    Despois, varias persoas comezan a morrer de forma imposible, e aínda que Carter non quer involucrarse, comezou a sospeitar que alguén si quere que o faga. Cando Carter comeza a investigar obrigado polas circunstancias, descubre que o legado de H.P. Lovecraft vai máis alá da ficción, que os seus relato contiñan claves, mensaxes secretas e algo absolutamente inesperado e abominable: a verdade sobre este mundo.

    O legado dunha das mentes máis retortas e brillantes de todos os tempos adopta unha nova forma para o século XXI.





  • Velaquí unha novidade moi especial. Trátase do "Atlas arqueolóxico da paisaxe galega" editado por Xerais.

    A paisaxe é un produto das formas de ser, de estar, de pensar e de actuar de cada sociedade. A paisaxe galega de hoxe é o resultado das nosas formas de ser, estar, pensar e actuar, mais tamén das daqueles que nos precederon no tempo. Moitas das cousas que consideramos máis características da paisaxe de Galicia son o produto ou o efecto da acción humana, e non só diso que chamamos a Natureza.


    Este libro é unha especie de atlas arqueolóxico das paisaxes culturais de Galicia, e dicimos «unha especie» porque non é un atlas entendido no sentido convencional de conxunto de mapas; o que fai é describir as diferentes formas da paisaxe que se foron sucedendo ao longo dunha boa parte da historia do que hoxe é Galicia, dende a prehistoria até a época medieval.


    O relato parte do que coñecemos como paisaxe tradicional para, logo, ir na procura dos seus elementos típicos, xa presentes –ou ausentes– nas paisaxes que o precederon e o foron conformando. Porén, as paisaxes arqueolóxicas son algo que non existe; os seus restos, ou ben se incorporaron en gran medida a formas posteriores de paisaxe, ou ben subxacen relictos e esquecidos baixo estas. Por iso precisamente as chamamos arqueolóxicas.


    A historia que facemos aquí é unha historia humana do antropoceno, un concepto que vén definir unha nova etapa xeolóxica marcada pola dominación humana dos sistemas da Terra, unha etapa en que a acción sociocultural modifica activamente o mundo e substitúe un medio natural por un medio cultural cada vez máis artificial.


    As autoras e os autores dos textos son: Roberto Aboal, Xurxo Ayán Vila, David Barreiro, Paula Ballesteros-Arias, Manuela Costa-Casais, Pastor Fábrega-Álvarez, João Fonte, Camila Gianotti, A. César González-García, Alejandro Güimil Fariña, Elena Lima Olivera, Raquel López Noia, Patricia Mañana-Borrazás, Antonio Martínez-Cortizas, Matilde Millán e Manuel Santos-Estévez.





  • Velaquí unha das máis novas publicacións da editorial Galaxia: "Todo canto fomos", de Xosé Monteagudo.

    Unha mestra que loita contra a desigualdade e os prexuízos sociais nunhas circunstancias difíciles. Un escritor de novelas policiais, residente en Londres, que descobre unha verdade sorprendente entre os papeis do legado da súa nai. Unha moza que persiste nun noivado secreto e prohibido. Un emigrante galego na Arxentina que non esquece a súa orixe mentres anda en procura do éxito económico. Un historiador que, arrastrado pola violencia dos acontecementos, lembra os momentos cruciais da súa vida. Estes son algúns dos personaxes que compoñen unha trama na que a normalidade é só a apariencia baixo a que se ocultan misterios inquietantes.

    "Todo canto fomos" é unha novela que percorre máis de un século da historia galega para devolvernos o relato dun pasado que segue alentando no presente.

    Ides quedar sen ela?



  • Presentámosvos hoxe dúas das máis recentes novidades da editorial compostelá Urco Editora: "Negruña", de Xosé Duncan", e "Da fría e distante estrela polar", de Tomás González Ahola.

    Unha cidade non é máis que o reflexo das almas dos seus habitantes e, cando unha podrece, as outras déixanse arrastrar até o extremo mías escuro e vil. Pasaron moitos séculos desde que A Coruña se converteu en Negruña, deseñada e pensada para ser máis eficaz dentro da economía do Consorcio de Cidades, mais gobernada e dirixida polos mesmos ineptos de sempre. As súas rúas xa non brillan alén das horas de luz permitidas polo Concello e a súa xente vive co temor perpetuo de que clausuren os seus fogares porque, malia que ninguén se atreva a dicilo publicamente, a clausura significa o exterminio dos distritos non produtivos, daqueles que acadaron cotas de desemprego superiores ás permitidas.

    Porén,  cando a corda se tensa tanto que está a piques de romper, neses días nos que nada semella recuperábel, será o momento en que aparezan heroes anónimos capaces de liderar exércitos.

    Unha guerra estoupará nas rúas de Negruña mais non será só unha loita entre veciñas e veciños. Nunha procura iniciada no principio dos tempos, a escuridade chegará para reclamar o "lume no sangue", para sacrificar os escollidos e iniciar unha nova orde mundial.

    Hai segredos no cosmos que non debemos coñecer, mais tamén hai outros, quizais, que xacen adurmiñados moi preto de nós. Unha vertixe numinosa invádenos cando ollamos os baleiros cósmicos e esas estrelas hostís e altivas, e preguntámonos se algunha vez chegaremos aló, se algunha vez os seus moradores estiveron aquí.

    Desde as primitivas sociedades cazadoras das estepas do norte extremo ata as xentes dun futuro afastado e prometedor, persiste a crenza de que hai un camiño para nós, un ronsel trazado no ceo nocturno por criaturas ás que nun tempo chamaron divindades, noutro tempo monstros.

    Quizais nunca obteñamos resposta, quizais nunca traduzamos a mensaxe. Quizais nos extingamos sen nos achegar nunca aos eidos da fría e distante estrela polar.

    Porén, quizais xa é tarde...



  • Velaquí unha das máis recentes novidades da editorial Galaxia na súa colección adicada ao ensaio: "De camiños, viaxeiros e camiñantes", de Santiago Lamas e Alfonso Lobato, obra agasallada co Premio Ramón Piñeiro de Ensaio 2015.

    En xullo de 1927, Vicente Risco, Ramón Otero Pedrayo e Ben-Cho-Shey camiñaron dende Ourense a Santo André de Teixido, no cabo do mundo. Na obra que nos ocupa, os autores desenvolven unha reflexión suxerente sobre o significado cultural das viaxes, sobre a relación entre camiño e literatura, movemento e lectura. Sobre os peregrinos, paseantes, guías de viaxe, turistas e vagabundos literarios, ademais das actuais e, nalgúns casos, perversas formas de camiñar. Desde a actualidade, o libro dialoga coa Galicia dos inicios do século XX mediante un estilo aberto e rico, seguindo o ronsel do ensaio e da digresión que descubriu e practicou con singular brillantez Michel de Montaigne.

    Un libro extraordinario que non debedes perder!



  • Velaquí unha das últimas novidades da editorial Xerais: "O anxo negro", a primeira novela de Manuel Gago.

    A principios dos anos 80, Nicolás Bren, capitán retirado da Mariña Mercante, recibe un estraño encargo por parte dos veciños dunha parroquia montañesa da Costa da Morte: recuperar a figura roubada duna Santa Mariña da que son moi devotos.

    A investigación emprendida polo capitán, xunto cos veciños da parroquia, levaraos a transitar pola trama dun sistema corrupto e a descubrir os incribles vínculos da talla cun dos instantes decisivos da historia de Europa.

    Unha novela trepidante coa que Manuel Gago se mergulla nas raíces profundas da cultura popular galega.

    A que estades agardando? Non perdades a oportunidade de facervos con esta extraordinaria novela dun autor que está chamado a converterse nun dos grandes da literatura galega.





  • Velaquí a nova aposta de Harper Collins: "Albert vuelve a casa", de Homer Hickman. Se desfrutaches con "El abuelo que saltó por la ventana y se largó", esta é, sen dúbida, a túa novela.

    A gran depresión converteu o soño americano nunha amarga traxedia e é aquí onde comeza a épica aventura de Elsie e Homer... Unha viaxe de case dous mil quilómetros cun caimán no asento de atrás e con John Steinbeck de pasaxeiro.

    Nos Estados Unidos de 1930, a Gran Depresión acurtou os horizontes de todo o mundo e Elsie Lavender atópase, unha vez máis, onde comezou: nos asentamentos mineiros de Virxinia Occidental. Só lle queda unha lembranza dos días felices pasados en Orlando: unha cría de caimán chamada Albert.

    Todo muda o día que se esgota a proverbial paciencia do seu home e Elsie ten que elexir entre Homer e Albert. Despois de pensalo un tempo, decide que só pode facer unha cousa: levar a Albert a Florida, o seu verdadeiro fogar.

    Comeza así unha odisea -unha viaxe coma ningunha outra- na que Elsie, Homer e Albert topan con todo, dende estrelas de cine a revolucionarios, Ernest Hemingway e furacáns, na súa loita por atopar o amor, a redención e un lugar ao que chamar fogar.

    Do autor de bestsellers Homer Hickman chega esta marabillosa novela sobre un home, a súa muller e un caimán.

    A que agardades? Vide por ela!




  • Velaquí unha novidade que temos en tenda dende hai poucos días: "Bosquexos para unha distopía", de Alberte Momán Noval, editado por Redelibros. En palabras do propio autor:

    Estes bosquexos son a miña propia banda sonora. Relatan as horas que dediquei a pasar por diante de bares abertos aos que rara vez accedín para calmar a sede, ou se cadra para escorrentar a friaxe da noite. Estes textos falan deste Lugo que apenas se aprecia, por próximo. Falan de calquera cidade na que exista un bar, unha festa popular ou a dor inmensa da violación continuada. Son tanto deste tempo que mancan cunha angustia que xa non se percibe. De tratarse dunha obra para intelectuais, faría referencia, como obriga, a O Potomak de Jean Cocteau, á creación dos seus Eugènes, duros, co grado de psicopatía xusto para afastarse da dor que causan, pero estes bosquexos non son aptos para retóricas baleiras, non precisan de grandes referentes, distintos dos seus protagonistas, que son, como non podería ser doutro xeito, as persoas coas que me fun atopando durante todos estes anos e sobre as que nunca tiven o valor de escribir. Pero, para que ningunha persoa poida sentirse estafada, véxome na obriga de aclarar que, quen procure nestas páxinas as suculentas declaracións dos seus protagonistas, adubadas coa tintura do sensacionalismo, debe saber que existen outras lecturas que lle han resultar moito máis proveitosas. Aquí móstrase, en moito casos, a dor que normalizan as estatísticas do Ministerio do Interior. A violencia e o acoso como feridas do subconsciente, no tempo no que a educación e a xustiza miran de semellar ausentes.

    Un libro único que non debedes perder!



  • Velaquí unha das últimas novidades da editorial Xerais, radicada dentro da súa colección Xerais Crónica. Tátase de "Historia das historias de Galicia", na que fai a labor de editor Isidro Dubert, e con textos de Manuel Gago, María del Carmen Saavedra Vázquez e o propio Dubert, entre outros.

    No seo da sociedade galega actual circulan distintas historias arredor da importancia que tiveron os celtas na nosa cultura, sobre a orixe do vello Reino de Galicia, a "doma e castración da nobreza", a existencia dos Séculos Escuros,a chegada e instalación dos cataláns, o fusilamento do Mártires de Carral ou o suposto "atraso secular" de Galicia. Unhas historias cuxo contido e sentido leva mudado en función das distintas coxunturas políticas e culturais polas que atravesou o país. Malia iso, e ata o de agora, rara vez os historiadores prestaron atención a eses cambios e mudanzas, ás súas implicacións sociais, culturais ou ideolóxicas ou ao que realmente se agocha tras elas. Os traballos recollidos neste volume tratan de pór remedio a este esquecemento, desvelando así aspectos pouco coñecidos -e mesmo inéditos- do noso pasado colectivo.

    Non perdades esta magnífica obra que profundiza nas raíces da nosa historia e reivindica a nosa identidade.



  • Traémosvos hoxe unha novidade dun dos autores máis destacado da poesía en galego: "Masculino singular", do lalinense Carlos Negro, editado por Xerais.

    "Masculino singular" é un corte de sangue no medio do afeitado; unha refutación do macho alfa que destrúe os afectos e converte o terror en linguaxe dominante. Tamén é un diario íntimo que reclama a tenrura nunha revolución de magnolias, pero sen pólvora, porque xa non precisamos himnos de batalla nin falos erectos nas portas dos aseos.

    "Masculino singular" é un código aberto aínda inconcluso, que se constrúe máis alá do propio texto, naqueles espazos sociais onde algúns homes aprenden unha lingua sen sufixos de exterminio. Porque nada semella máis urxente que procurar unha saída de emerxencia dese templo onde a virilidade segue a ser o valor máis sagrado da tribo.

    Carlos Negro (Lalín, 1970), autor de obras como "Far-West" (2001) ou "Penúltimas tendencias" (Premio da AELG á mellor obra de literatura infantil e xuvenil do ano 2014), iniciouse no xénero poético con "As laranxas de Alí Babá" (1998)- Recibiu tamén o premio Johán Carballeira polo poemario "Héleris" (2003) e o Victoriano Taibo por "Cultivos tranxénicos" (2008). Ensaiou o xénero satírico no dicionario "Abelcebú" (2010), de carácter burlesco. Nos últimos anos vén desempeñando un continuo labor de achegamento da poesía ao público xuvenil, a través de recitais e obradoiros por toda Galicia.

    Ides quedar sen el?



  • Velaquí vos deixamos as fotos do contacontos que tivemos o sábado pasado na nosa libraría. Mil grazas a Estefanía Padullés por vires á nosa casa a contarnos a grandes e pequenos o seu marabilloso conto.

    E, coma sempre, mil grazas a todos os asistentes, porque sen vós todas estas cousas non serían posibles!