• Correspondencia (1928-1958). Cartas inéditas e dispersas, de Carlos Maside

    Velaquí unha das máis recentes novidades da editorial compostelá Alvarellos: "Correspondencia (1928-1958). Cartas inéditas e dispersas", de Carlos Maside.

    O indiscutible renovador da arte galega da primeira metade do século XX, Carlos Maside (Pontecesures, 1897-Santiago, 1958) mantivo, durante toda a súa vida, unha rica e continuada relación epistolar con gran parte da intelectualidade galega do seu tempo: a do exilio e tamén a do chamado "exilio interior" (tal era o seu caso).

    Este volume reúne 179 cartas do pintor -a maior parte delas, inéditas-: dende 1928 ata a derradeira, dous meses antes de falecer. A correspondencia, atravesada primeiro polo silencio da guerra e despois pola longa represión, foi reunida e transcrita pola catedrática de Historia María Esther Rodríguez Losada, nunha edición ao coidado do catedrático de Filoloxía Galega Anxo Tarrío Varela.

    Estas páxinas contan, de seu, a historia íntima dun tempo e dun país. Cartas a Luís Seoane, a Castelao, a Federico García Lorca, a Bal y Gay, a Otero Pedrayo, a Isaac Díaz Pardo, a Cunqueiro, a Paz Andrade, a Fernández del Riego, a Laxeiro...

    Recóllese a correspondencia de ida e moitas veces tamén a de volta, entre a que destaca o fecundo e prolongado intercambio epistolar con Luís Seoane.

    O volume complétase coa incorporación de fotografías e manuscritos nunca vistos ata hoxe.



    0 comentarios → Correspondencia (1928-1958). Cartas inéditas e dispersas, de Carlos Maside

    Publicar un comentario